Kubra Məhərrəmova yazır…
Kremlin küçüyü Marqarita Simonyan dünən öz “Telegram” kanalında özü boyda dastan yazıb. Niyə küçüyü? Çünki bunun böyüyüb it olmasına çox var. Kremlə lazım olanda böyük itlərini qısqırdır, arada isə Marqarita Simonyan zingildəyir.
Simonyanın yazdığının qısa tərcüməsi:
“Paşinyan Qarabağı Azərbaycanın ərazisi kimi tanıdı. O məhz buna görə hakimiyyətə gəlib, bunun üçün onun əlindən tutub hakimiyyətə gətirdilər.
Bütün bunları əvvəldən demişdim.

Siz isə onun kürkünü yalayır, ona səs verir, meydanlarda onun arxasınca qaçır, mənə tonlarla təhqir və hədələr yazıb, məni türk soxulcanı adlandırırdınız. Siz hesab edirdiniz ki, kim ki Paşinyanı dəstəkləmir, deməli, erməni xalqını dəstəkləmir. Siz aşkar olanı görmək istəmədiniz. Və erməni xalqına xəyanət edən liderin ardınca sürü kimi getdiniz. Məhz indi keçin güzgünün qabağına və öz üzünüzə tüpürün, Qarabağ eşşəyi olduğunuz, elə eşşək olaraq da qaldığınız fikri ilə həyatınızın sonuna qədər yaşayacağınızla barışın”.
İndi Simonyan (ya Kremldəki sahibi) öz dünyasında düşünür ki, sülh danışıqlarının final mərhələsində öz zingiltisi ilə erməni xalqını müharibəyə, döyüşə, sülh danışıqlarının dayandırılması tələbi ilə Paşinyanı istefaya göndərməyə nail olacaq. Bunlar, həqiqətən də, Qafqazın daim qaynar qazan olmasını, ölüm-itimlə yaşamasını istəyirlər: gör nə əladır – özün otur Moskvada, bahalı penthauslarda, bahalı kokteyllər iç, qara kürü ye, Qafqazda da adamlar bir-birini məhv eləsinlər.
Nə asandır – başqalarının övladlarını dəfn etməyinə şərh vermək. Yalançı göz yaşları töküb, “dərdinizə şərikəm” demək. Əslində isə bütün mümkün olan vasitələrlə Qarabağı od içində saxlamaq.
Kremlin başı, ayağı, qolu Ukraynada ilişib qalsa da, boğaza qədər qan içində çabalasa da, gözü Qafqazdadır. Öz imperiya arzularından əl çəkmədən daim buranı qarışdırmaqdır arzusu.
Hər dəfə daha çox yaxınlaşıram bu həqiqətə. Gerbində təsvir olunmuş ikibaşlı qartalın caynaqlarında olan hakimiyyət rəmzi artıq laxlayır. Artıq nə “derjava“, nə “skipetr” əvvəlki kimi möhkəm tutulur. İmperiyalar qan və sümük üstündə qurulduğundan, onların süqutu da qan və sümüklə bitir.
Bu gün Azərbaycanın mütləq üstünlüyü həm masada, həm də meydanda imkan verir ki, sülh müqaviləsini tezliklə qarşı tərəfə imzalatdırsın.
Çünki rəsmi Bakı bir daha müharibə istəmir. Rəsmi Bakı çalışır ki, qısa zaman ərzində nəqliyyat və iqtisadi ticarət sahəsində daha böyük uğurlar əldə olunsun. Rəsmi Bakı əzm və gücünü Qarabağı dirçəltmək üçün sərf etmək istəyir. Daha müharibə üçün yox.
Bunun əldə edilməsi üçün isə bütün istiqamətlərdə, həm də siyasi müstəvidə maksimal dərəcədə məhsuldar çalışır. Tezliklə ölkə başçısından sülh müqaviləsinin imzalanması haqqında xəbər alacağımıza əminəm. Çünki illər uzunu dünyanın aparıcı siyasətçilərinin, ekspertlərinin “mümkün deyil” söylədiyi işlərin hər birinin altına ölkə başçısı imzasını atdı.
www.RIA24.az