Naxçıvan Muxtar Respublikası Mərkəzi Xəstəxanasındakı 94 həkimdən 50-si ixtisasına uyğun fəaliyyət göstərmir.
“Report”un məlumatına görə, eyni hal Naxçıvan Perinatal Mərkəzi və bir sıra digər səhiyyə ocaqlarında da müşahidə olunur. Hətta Babək Rayon Mərkəzi Xəstəxanasında laboratoriya müdiri vəzifəsinə ixtisasca aqronom olan şəxs təyin olunub.
Hazırda muxtar respublika səhiyyəsində 400-dən çox vakansiya mövcuddur. İxtisaslı kadrlar çatışmadığından tibb müəssisələrində bu qədər boş yerlər yaranıb. Bu, o demək deyil ki, Naxçıvanda ixtisaslı istedadlı həkimlər yoxdur. Bütün bunlar ötən illərdə muxtar respublikada istedadlı həkimlərin fəaliyyətinə süni maneələrin törədilməsi, lazımi iş imkanlarının yaradılmaması nəticəsində yaranıb. Nəticədə yüzlərlə peşəkar tibbi kadr Naxçıvanı tərk edərək başqa yerlərə gedib. Hazırda paytaxt Bakı və qonşu Türkiyədəki dövlət və özəl tibb müəssisələrində Naxçıvandan gedən onlarla həkim fəaliyyət göstərir və kifayət qədər tanınır.
Son aylar muxtar respublikanın səhiyyə sistemində əsaslı islahatlar aparılır, infrastruktur yenidən qurulur, kadr potensialı gücləndirilir.
Bu islahatlara uyğun olaraq qeyri-ixtisas həkim fəaliyyəti məsələsi də öz həllini tapır. Son aylarda işə götürülən tibbi kadrlar öz ixtisasına uyğun yerlərə təyin olunurlar.
Qanuna müvafiq olaraq vakansiyaya ya həmin ixtisas üzrə personal təyin olunur, ya da müəyyən hallarda həmin sahədə fəaliyyət göstərən mütəxəssislər müvafiq ixtisasartırma kurslarına cəlb olunurlar. Səhiyyənin inkişafı istiqamətində atılan addımlar isə öz nəticəsini verir. Respublikamızdan və dünyanın digər ölkələrindən yüksək potensiallı mütəxəssislər fəaliyyətini davam etdirmək üçün muxtar respublikaya üz tuturlar.
www.RIA24.az
