“Amerika Birləşmiş Ştatları Vətən müharibəsində Azərbaycanın qələbəsindən sonra Cənubi Qafqazda dayanıqlı sülh və sabitlik mühiti üçün yaranan tarixi şansı özünün maraqlarına təhdid hesab edir. Çünki strateji coğrafi mövqeyə malik, yaxud təbii sərvətlərlə zəngin regionlarda ABŞ maraqlarını yalnız münaqişələr hesabına təmin edir”.
Bu fikirləri Oxu.Az-a Milli Məclisin deputatı Bəhruz Məhərrəmov deyib. Onun sözlərinə görə, yaxın tarixdən bəllidir ki, dünyanın ayrı-ayrı bölgələrinə “sülh və demokratiya” adı altında fəlakətlər daşıyan ABŞ, həmin ölkələr və toplumlar artıq müqavimət göstərə bilməyəcək duruma düşdükdən sonra həmin regionu nəzarətə alaraq talan etməyə başlayır:
“Bir milyondan artıq insanın məhv edildiyi İraq və soyqırımına məruz qalan Əfqanıstanın timsalında aydın şəkildə müşahidə edə bilirik ki, dünyada bütün gərginlik nöqtələri ABŞ-nin istəyi və planlarına uyğun yaradılır.
Azərbaycan və Ermənistan arasında 30 ildən artıq davam etmiş münaqişənin gedişatında da Vaşinqton eyni ssenariyə sadiq qalmış, münaqişənin dondurularaq yekun həllə nail olunmaması üçün bütün vasitələrdən istifadə olunmuş, hətta bu məqsədlə işğal faktorunun legitimləşdirilməsinə çalışmışdır. İstər siyasi, istər iqtisadi cəhətdən tam müstəqilliyə nail olan, ciddi ordu quruculuğu həyata keçirən Azərbaycanın güclənməsinin qarşısını almaq üçün ABŞ ölkəmizdə dəfələrlə hakimiyyət çevrilişi edərək özünün marionetlərindən birini iqtidara gətirmək üçün cəhdlər edib. Ölkədə özünü “əsas siyasi müxalifət” elan edən antimilli ünsürlər də bu prosesdə məmnuniyyətlə Vaşinqtonla əməkdaşlıqdan çəkinməyərək illər ərzində davamlı şəkildə okeanın o tayından gələn təlimatlar ilə çoxsaylı xəyanətlərə imza atıb, ABŞ-nin maliyyə yardımları hesabına ayaqda qalıblar.
Lakin ABŞ Azərbaycan xalqının Heydər Əliyev yoluna və İlham Əliyev iqtidarına bağlılığını düzgün hesablaya bilmədiyi üçün hər dəfə fiaskoya uğrayıb. İlham Əliyevin regionda işğal və təcavüzə, o cümlədən separatizmə ən böyük zərbəsi hesab olunan 44 günlük savaşdakı qələbəmizdən sonra isə artıq Vaşinqton qeyri-ənənəvi üsullara əl atmaq məcburiyyətində qalıb. 30 ilə yaxın bir periodda xaltası Vaşinqtonun əlində olan siyasilərdən fayda görməyən ABŞ bu gün Azərbaycanın ən böyük üstünlüklərindən biri olan ailə və milli dəyərlərini hədəfə alıb. LGBT, “feminist” və “NO WAR”çıları maliyyələşdirməklə ABŞ Azərbaycanı daxildən parçalama planına start verib. Bu prosesin icrası isə antiislam və antitürk mövqeyini gizlətməyən radikal-terror təfəkkürlü xüsusi xidmət zabiti Samanta Pauer və onun rəhbərlik etdiyi USAID-ə tapşırılıb. Baxmayaraq ki, bu çirkin məqsədlərlə hər il USAID-ə ayrılan vəsaitlər hesabına regionu mina təhlükəsindən xilas etmək olar, yaxud ən azı yüz mindən çox insanın işğaldan azad olunmuş torpaqlara ləyaqətli qayıdışını təmin etmək mümkündür. Təbii ki, bəşəri dəyərlərin qlobal müdafiəçisi adına iddia edən ABŞ-ni əslində bu amillər maraqlandırmır. Nəticə etibarilə qeyri-ənənəvi üsulların da effekt vermədiyini görərək ABŞ ənənəvi metoda, yenidən vasitəçilik instituna üz tutub. Artıq münaqişə olmadığı üçün isə Vaşinqton bir müddət öncə yekun sülh müqaviləsinin hazırlanması istiqamətində platforma təşkil edərək proseslərə “töhfə”sini vermək niyyətini bəyan etdi. Bütün dialoqəsaslı platformalardan faydalı formada yararlanmağın mümkünlüyü xəttini tutan Azərbaycan da Vaşinqton prosesinə müsbət yanaşdı. Lakin ilk vaxtlar pozitiv meyillər müşahidə olunsa da, Vaşinqtonun maskası cırıldı və artıq ABŞ tədricən özünün çirkin, riyakar və ikiüzlü simasını daha gizlədə bilməyir”.
Bəhruz Məhərrəmov vurğulayıb ki, regionda sülh və təhlükəsizlikdən danışan ABŞ istər Dövlət Departamentində, istərsə də qanunverici orqanlarında açıq formada separatçılara dəstək verməyə, Azərbaycanın ərazi bütövlüyünə hörmətsizlik ruhunda mühit formalaşdırmağa başlayıb:
“Baxmayaraq ki, paralel olaraq Vaşinqton elə ərazi bütövlüyü və suverenlik prinsiplərini rəhbər tutaraq Ukrayna, Gürcüstan və Moldovaya münasibətdə “alovlu” bəyanatlar verir, separatizmin yolverilməzliyindən danışır. Azərbaycana münasibətdə isə separatçıların ən böyük dəstəkçilərindən biri kimi məhz Vaşinqton özü çıxış edir. Təsəvvür edin, ABŞ separatçı rejimin terrorçu koordinatorlarını okeanın o tayına səfərə dəvət edib görüşlər keçirərək, cinayətkar rejimin ofisini yaradaraq separatizmə bütün mümkün dəstəyi verib. Eyni zamanda Dövlət Departamentinin birbaşa dəstəyi ilə fəaliyyət göstərən fondlardan “Qarabağa yardım”, habelə mina təmizləmə adı altında milyonlarla dollar yardım verərək separatizmin maliyyə dayaqlarından birini təşkil edib. Belə olan halda Vaşinqton Ukraynada, yaxud Gürcüstanda separatizmlə mübarizədə səmimi ola bilməz. Çünki ABŞ üçün Ukrayna və Gürcüstanın suverenliyi və ərazi bütövlüyü yox, oradakı münaqişəli vəziyyətin özü maraqlıdır və əslində 40 milyard dollardan artıq vəsait ayırmaqla Vaşinqton Kiyevin haqlarını yox, münaqişənin davamlılığını təmin edib. Məhz bu səbəbdən Vaşinqton bu günə qədər bir dəfə də olsa, Rusiya və Ukraynanı sülhə çağırmayıb, əksinə müharibəni daha da körükləyib.
Azərbaycanda da eyni ssenari rəhbər tutulsa da, xalq-iqtidar birliyi Vaşinqtonun planlarını uğursuz cəhdlərə çevirib və bundan sonra da bu kimi ikiüzlü niyyətlərin realizə şansı yoxdur. Əksinə, Vaşinqton özü regionda maraqlarını təhlükəyə atır və bu gedişlə artıq regiondan təcrid olunmuş Fransa kimi ABŞ də bölgəyə kənardan baxmaqla kifayətlənməli olacaq”.
Aysel Aslan
www.RIA24.az
