Heydər Əliyev adına Azərbaycan Ali Hərbi Məktəbinin (AAHM) təşkilatçılığı ilə ümummilli lider Heydər Əliyevin anadan olmasının 98-ci ildönümünə həsr olunan “Dağlıq Qarabağ münaqişəsinin həlli: Azərbaycan Ordusunun peşəkarlığı” mövzusunda elmi-praktik konfrans keçirilib.
Bu barədə Müdafiə Nazirliyi məlumat yayıb.
Konfransda hərbi məktəbin, Silahlı Qüvvələrin Hərbi Akademiyasının, Fövqəladə Hallar Nazirliyinin Akademiyasının zabit və müəllimləri iştirak edib.
Əvvəlcə konfrans iştirakçıları AAHM-in muzeyləri və ideoloji mərkəzi ilə tanış olub və ali hərbi məktəbdə çap edilən tədris vəsaitlərindən ibarət sərgiyə baxıblar.
Konfransın plenar iclasında AAHM rəisinin tədris və elmi işlər üzrə müavini, polkovnik, dosent Ruslan Məmmədov mövzuya dair ətraflı məruzə ilə çıxış edib.
Sonra konfrans bölmələr üzrə davam edib. Ümumilikdə 30 zabit və müəllimin mövzu ilə bağlı məruzələri dinlənilib və mövzular ətrafında fikir mübadiləsi aparılıb.
