“Azərbaycana ilk səfərimi başa vurdum: çox şey öyrəndim və gördüm. Dolğun bir səfər oldu. İnanıram ki, Azərbaycanla tərəfdaşlığımıza yenidən başlamağı və yeni təkan verməyi bacardıq”.
Bu barədə dünən Azərbaycanda rəsmi səfərdə olan Avropa İttifaqının (Aİ) qonşuluq və genişlənmə üzrə komissarı Oliver Varhelyi Avropa Komissiyasının saytında yazıb.
O, keçən cümə günü Avropa İttifaqının Şərq Tərəfdaşlığı ölkələri ilə yeni bir tərəfdaşlıq elan etdiyini xatırladıb.
“Regional tərəfdaşlarımız üçün hərtərəfli paket qəbul etdik. Əməkdaşlıq planını şəxsən təqdim etmək üçün bu ölkələrə səfər etmək tərəfimizdən güclü siyasi siqnaldır. Sənəd COVID-19 böhranından sonra regionun iqtisadi bərpasına kömək etmək məqsədi daşıyır”, – deyə Aİ komissarı yazır.
O, bu fəaliyyət planının Aİ-nin regional tərəfdaşları ilə koordinasiya və konsultasiya şəklində hazırlandığını vurğulayıb.
“Bu gördükləriniz regionun iqtisadi və sosial inkişafında əsas əngəllərin öhdəsindən gəlməyə kömək etmək üçün birgə apardığımız işdir”, – deyə o vurğulayıb.
Onun sözlərinə görə, Azərbaycan COVID-19 səbəbiylə ciddi mənfi iqtisadi reaksiyanın qarşısını alan və pandemiya ilə uğurlu mübarizə aparmağı bacaran regionun ən çiçəklənən ölkəsidir.
“Ancaq Azərbaycanın çiçəklənməsi həm də bütün Cənubi Qafqaz regionunun inkişafından asılıdır. Biz Azərbaycan rəhbərliyi ilə bölgədəki iqtisadi bərpa məsələlərini (hansı ki, Azərbaycana da fayda gətirəcək) müzakirə etdik.
Ümumi bir mövzu var – əlaqələrin olmaması. Bu səbəbdən orta və uzun müddətdə iqtisadi yüksəlişə, iş yerlərinin açılmasına səbəb ola biləcək ticarət və investisiya üçün məhdud potensial görürük. Rabitə o deməkdir ki, Qara dənizi Xəzərlə birləşdirməliyik. Bizə Azərbaycandan keçəcək, Xəzər dənizindən Qara dənizə və Avropaya gedən ticarət yolları lazımdır”, – deyə Oliver Varhelyi yazır.
O qeyd edib ki, Azərbaycan Avropa İttifaqının maliyyə köməyinə ehtiyac duymayan, çiçəklənən ölkədir.
“Buna görə də bu ölkəyə fərqli yanaşırıq. İqtisadi gələcəyin birgə layihəsinə gəldikdə, köməyimiz biliyin təminatı, investor cəlb etmək və ticarət yolları yaratmaqda ola bilər. Ticarət yolları uzunmüddətli perspektivdə bölgənin və Avropanın maraqlarına xidmət etməlidir”, – deyə o vurğulayıb.
Avropa komissarı, həmçinin Bakı Beynəlxalq Dəniz Ticarət Limanına səfəri barədə danışıb.
“Limanın baş direktoru (Taleh Ziyadov) ilə çox xoş bir görüşüm oldu, o, limanın fəaliyyətini inkişaf etdirmək üçün dəqiq planları olduqlarını açıqladı. Ancaq limanın işləyə biləcəyi mallara ehtiyacı var, liman isə yalnız Şərqlə deyil, həm də Qərblə əlaqəli olduqda mal ala bilər. Bakı limanının inkişafı – daha rəqəmsal, ekoloji cəhətdən təmiz və bölgədə daha da rəqabətədavamlı hala gəlməsi üçün malların hazırlanmasını sürətləndirməklə əlaqədar təkliflər verdik.
Dünən axşam iqtisadiyyat naziri (Mikayıl Cabbarov) və energetika naziri (Pərviz Şahbazov) ilə şam etdim, onlarla ilk növbədə bu məsələni müzakirə etdik. Bundan başqa digər strateji məqamlara, o cümlədən Avropanın maraq dairəsində olan enerji tərəfdaşlığımız, xüsusilə də tədarüklərimizin diversifikasiyası və kömür enerjisindən istifadədən tədricən imtina etmək məsələsində də toxunduq. Azərbaycan güclü tərəfdaşdır.
Biz hidrogen kimi yaşıl enerji mənbələrinə əsaslanan əməkdaşlığın növbəti mərhələsinə keçmək üçün bu ortaqlığı necə inkişaf etdirə biləcəyimizi müzakirə etdik. Həmçinin Avropanın Azərbaycana daha müasir və ekoloji cəhətdən təmiz kənd təsərrüfatı yaratmağa necə kömək edə biləcəyindən danışdıq. Dostlarımızın ortaq əməkdaşlıqda maraqlı olduqlarını görməkdən çox məmnun qaldım, bizim Azərbaycanda kənd təsərrüfatının inkişafına kömək edəcək yeni fikirlərimiz, yeni texnologiyalarımız var”, – deyə o vurğulayıb.
Varhelyi Azərbaycanın Qarabağ regionunun bərpasından da bəhs edib.
“Nəhayət, biz Avropa İttifaqı olaraq müharibənin nəticələrinin aradan qaldırılması və regionda uzunmüddətli sülh üzərində dəstəyimizi təklif etdiyimiz Qarabağın münaqişədən sonrakı inkişaf planını və postmünaqişə fikirlərini müzakirə etdik. Biz Gürcüstanın köməyi ilə hərbçilərin mina xəritələri ilə mübadiləsində hər iki tərəfin açıq qarşılıqlı fəaliyyətinin şahidi olmağımızı çox vacib hesab edirik.
Burada iki tərəfdaşı bu addımı atmağa inandıran Gürcüstanın baş nazirini (İrakli Qaribaşvili) və Gürcüstan hökumətini qeyd etmək istərdim. Bu, bizim alqışladığımız və dəstəklədiyimiz vacib addımdır. Bu yola davam etmək üçün üzərimizə düşəni etməyə, maddi və ya başqa şəkildə bacardığımız dəstəyi göstərməyə hazırıq. Faydalı hesab edilərsə, Avropa İttifaqı bölgənin inkişafına və bərpasına başlamasına kömək etmək üçün hər iki tərəf üçün açıqdır”, – deyə Avropa Komissarı vurğulayıb.
Xatırladaq ki, Varhelyi Cənubi Qafqaza səfəri zamanı iyulun 7-də Gürcüstanı ziyarət edib, bu gün isə Ermənistana yollanıb.
