Bakı. Trend:
ABŞ administrasiyası tərəfindən Beynəlxalq İnkişaf Agentliyinin
(USAID) fəaliyyətinin dayandırılması tamamilə doğru qərardır.
Əslində, təşkilatın fəaliyyətinin dayandırılması ilə bağlı proses
fevraldan başlamışdı. İyulun əvvəlində isə proses məntiqi sonluğuna
çatdı.
Bu fikirləri Trend-ə açıqlamasında Milli Məclisin deputatı
Sevinc Fətəliyeva deyib.
Deputat bildirib ki, ABŞ hökumətinin siyasətinə uyğun gələn və
ölkənin maraqlarını təşviq edən xarici yardım proqramları bundan
sonra Dövlət Departamenti tərəfindən idarə olunacaq:
“Tramp administrasiyasının USAID-i ləğvi etməsinə səbəb qurumun
xərclərinin çox yüksək olmasına rəğmən, faydasının çox az
olmasıdır. Hələ martda USAID tərəfindən idarə olunan layihələrin
80%-i ləğv edilib. Qurumun 6 200 layihəsindən yalnız minə yaxınının
Dövlət Departamentinin nəzarəti altında davam edəcəyi qərara
alınıb”.
Millət vəkilinin sözlərinə görə, USAID ABŞ Mərkəzi Kəşfiyyat
qurumunun alt qolu kimi yaradılıb və yardım adı altında ayrı-ayrı
ölkələrin daxili işlərinə aktiv şəkildə müdaxilə etmək,
qeyri-sabitlik, çevriliş və xaos üçün münbit şərait yaratmağa
çalışıb:
“Sözügedən qurumun vaxtilə respublikamızda müxtəlif adlar
altında fəaliyyət göstərən təşkilatları maliyyələşdirməklə onların
vasitəsilə Azərbaycan əleyhinə qeyri-qanuni aksiyaların
permanentliyini təmin etməyə çalışdığına dair təkzibolunmaz faktlar
var. Bununla yanaşı, USAID bu fəaliyyətini pərdələmək üçün
regionlarda müxtəlif layihələr həyata keçirirdi.
USAID-in Azərbaycandakı fəaliyyətindəki qeyri-şəffaflıq,
qapalılıq və siyasi proseslərə müdaxilə ilə yanaşı, mənfi
amillərdən biri agentliyin “erməni kartı”ndan istifadəsi ilə
bağlıdır. Bu məsələdə qurumun direktoru Samanta Pauer aktiv rol
oynayırdı. Ötən ilin sentyabrında təşkilat Ermənistana maliyyə
yardımının həcmini iki dəfədən çox artıracağını elan etmişdi”.
S.Fətəliyeva xatırladıb ki, təşkilat rəsmən ləğv olunmamışdan
əvvəl onun ölkəmizdə fəaliyyəti dayandırılmışdı.
Milli Məclisin deputatı Könül Nurullayeva isə
Trend-ə
açıqlamasında deyib ki, USAID-in beynəlxalq yardım təşkilatından
daha çox cinayətkar fəaliyyətlə məşğul olduğu üzə çıxıb:
“ABŞ prezidenti Donald Tramp USAİD-i ölkə büdcəsindən əsassız
olaraq böyük məbləğdə pul “yeyən” struktur hesab edir. O, açıq
şəkildə bəyan edib ki, atdığı addımlar USAİD-də korrupsiyanın
indiyə kimi görünməyən miqyas alması ilə əlaqədardır. Təkcə 2023-cü
ildə ABŞ beynəlxalq yardıma 68 milyard dollar xərcləyib. USAID-in
büdcəsi isə 40 milyard dollar təşkil edir ki, bu da ABŞ-nin illik
hökumət xərclərinin təxminən 0,6%-i deməkdir.
Millət vəkili bildkirib ki, USAID müxtəlif ölkələrdə, o
cümlədən, Cənubi Qafqazda xaos, vətəndaş qarşıdurması mexanizminin
icraçısı olub:
“Bu təşkilat 707 media, 6 200 jurnalist və jurnalistika
sahəsində çalışan 279 QHT maliyyələşdirib. Bu maliyyələşmə isə
müstəqil siyasət yeridən dövlətlərə qarşı qarayaxma kampaniyalarına
yönəldilib. Azərbaycanda 2012-ci ildə “Eurovision” mahnı
müsabiqəsi, 2015-ci ildə keçirilən ilk Avropa oyunları da daxil
olmaqla, həmçinin, 44 günlük Vətən müharibəsi vaxtı, Laçın yolunda
ekoloqların aksiyaları, COP29 dövründə beynəlxalq mediada ölkəmizə
qarşı aparılan aparılan çirkin kampaniyanın da arxasında elə USAID
dayanırdı”.
Deputat vurğulayıb ki, USAID-in düzgün icra olunmayan və ya
gözlənilən nəticəni verməyən müqavilələrinin ləğvindən əldə edilən
qənaət 110 milyon dollara çatıb.
“Faktlar onu deməyə əsas verir ki, USAID fəaliyyəti dövründə heç
vaxt ikitərəfli humanitar əməkdaşlığın inkişafının təşviqi ilə
bağlı bəyan edilmiş məqsədlərə cavab verməyib. Təşkilat ölkələr
daxilində xaos yaradan media orqanları və QHT-lərin əsas sponsoru
olub.
Bu cinayətkar təşkilat Əfqanıstanda narkotik istehsalına, eyni
zamanda, “Əl-Qaidə” təşkilatına dəstək verməkdə də ittiham olunur.
Bu qurumun fəaliyyətinin dayandırılması iğtişaşlar yaratmaq,
sabitliyi pozmaq cəhdlərinin qarşısının alınması deməkdir”, – deyə
K.Nurullayeva fikrini tamamlayıb.
