“Azərbaycan və Serbiyanın ümumi maraqları ilk növbədə ondan irəli gəlir ki, onlar öz tarixlərinin əhəmiyyətli hissəsini daha böyük dövlət ittifaqı çərçivəsində yaşamış iki müstəqil ölkədir: Azərbaycan SSRİ-nin tərkibində idi, Serbiya isə keçmiş Yuqoslaviya respublikalarından biri olub”.
Bu sözləri serbiyalı analitik Slobodan Samarciya Bakı və Belqradın ümumi maraqları nədən ibarət olduğu barədə sualı cavablandırarkən deyib.
O, Oxu.Az-a müsahibəsində qeyd edib ki, müstəqilliyini bərpa etdikdən sonra hər iki dövlət öz xarici siyasətini müəyyənləşdirməli, müttəfiqlər tapmalı, dünyadan və onun yaxın mühitindən gələn bütün hücumlara, xüsusən də tarix boyu ölkələrimizin rəqibi və hətta düşməni kimi özünü sübut etmiş xalqlara və dövlətlərə yaxşı cavab verə biləcək sabit dövlət və ictimai sistemlər yaratmalı idi.
“Bundan əlavə, ölkələrimiz ilk növbədə bu bölgələrdə tarixi kökləri olmayan insanların məskunlaşdığı ərazilərin mövcudluğuna görə daxildən daha da parçalanma cəhdləri ilə üzləşirlər. Azərbaycanda bu Qarabağ, Serbiyada isə Kosovo və Metohiyadır. Təəssüf ki, beynəlxalq ictimaiyyət problemlərin təsirinə məruz qalan tərəflərin maraqları naminə onun həlli üçün çox az iş görür.
Mövcud beynəlxalq hüquqa uyğun olaraq birgə və prinsipial fəaliyyət Bakı və Belqradın səy göstərdiyi şeydir. Bu mənada ərazilərinin bölünməzliyi ilə bağlı prinsipial mövqe Azərbaycan və Serbiya xalqları üçün rəhbər ideyadır. Dostunuzun kim olduğunu və lazım olanda kimə arxalana biləcəyinizi bilmək həmişə vacibdir. Serbiya ilə Azərbaycan isə əsl dostdur”, – deyə o bildirib.
Nair Əliyev
