“Azərbaycanın müstəqillik tarixində qazandığı uğurlara diqqəti yönəldərək bildiririk ki, bu gün Azərbaycan nefti tam şəkildə Azərbaycan xalqının maraqlarına xidmət edir. İndi Azərbaycan bütün reytinqlərdə ən qabaqcıl yerlərdədir. Ölkəmizdə aparılan infrastruktur siyasəti, infrastruktur layihələrinin icrası nümunə göstərilir.” Bu sözləri dövlətimizin başçısı İlham Əliyevin Heydər Əliyev adına Bakı dərin özüllər zavodunda “Abşeron” yatağının dəniz əməliyyatlarının təməlqoyma mərasimi çərçivəsində Azərbaycan Televiziyasına, İctimai Televiziyaya və Real Televiziyasına müsahibəsində söylədiyi fikirlərə münasibət bildirən millət vəkili Kamaləddin Qafarov söyləmişdir.
K.Qafarov bildirmişdir ki, bu nailiyyətlərin qazanılmasında indi ölkəmizə uğurla rəhbərlik edən Prezident İlham Əliyevin də böyük xidmətləri olmuşdur. Azərbaycan Prezidenti SOCAR-da 9 il şirkətin vitse-prezidenti kimi xarici əlaqələrə rəhbərlik etmiş və əsas kontraktların hazırlanmasında, imzalanmasında fəal rol oynamışdır. Azərbaycan tərəfinin inandırıcılığı sayəsində yeni kontrakt imzalanmış, “Total” şirkəti ilə SOCAR-ın əməkdaşlığı nəticəsində böyük qaz-kondensat yatağı aşkarlanmışdır.
Milliət vəkili sözünə davam edərək bildirmişdir ki, “Abşeron” yatağının istifadəyə verilməsi də Prezident İlham Əliyevin iradəsi ilə baş tutur.Bu yataqda ilkin proqnoza görə 350-360 milyard kubmetr qaz ehtiyatları vardır.Artan daxili tələbatı ödəmək məqsədilə Abşeron”un birinci mərhələsində çıxarılacaq qaz daxili tələbatlara istiqamətləndiriləcək.Yataqda 100 milyon ton kondensatın olması neft hasilatını və ixracını sabit saxlamağa imkan verir.Təqribən 7 milyard dollar dəyəri olan “Mərkəzi-Şərqi Azəri” adlanan yeni layihənin icrası nəticəsində yeni mənbələrdən hasilat artacaq.
Millət vəkili möhtərəm Prezidentimizin qeyd olunan müsahibəsində söylədiyi “Müstəqillik bizim əsas dəyərimizdir və biz nə qədər güclü olsaq, nə qədər qüdrətli olsaq, müstəqilliyimiz o qədər də möhkəm olacaqdır” fikirlərini vurğulayaraq, bu gün Azərbaycanın davamlı iqtisadi inkişafını təmin edən “Əsrin müqviləsi”nin siyasi əhəmiyyətini də xüsusi qeyd etmişdir.
Dövlətimizin başçısı İlham Əliyevin irəli sürdüyü “Neft bizim üçün məqsəd deyil, daha yaxşı həyat yaratmaq, daha yaxşı ölkə qurmaq, daha yaxşı şərait yaratmaq üçün vasitədir” tezisi bugünkü reallıqlarımızda öz əksini tapıb. “Qara qızıl”ın insan kapitalına çevrilməsi uğurlarımızın davamlılığını şərtləndirir. Möhtərəm Prezidentimizin rəhbərliyi ilə aparılan təkmil islahatlar, iqtisadiyyatın elmi əsaslara söykənməsi, şaxələndirmə siyasətinin uğurla həyata keçirilməsi nəticəsində paytaxt və bölgələrdə, kənd və qəsəbələrdə aparılan genişmiqyaslı quruculuq işləri, qarşıdakı dövrlər üçün müəyyənləşdirilən hədəflər bir daha təsdiqləyir ki, inkişafın Azərbaycan modelinin mövcudluğu parlaq bir reallıqdır.
K.Qafarov bildirmişdir ki, sentyabrın 20-də Azərbaycan Prezidenti İlham Əliyevin ölkə televiziyalarına verdiyi müsahibədə əsas məqamları daxili və xarici siyasət məsələlərinin dərin və praqmatik təhlili, Ermənistan-Azərbaycan, Dağlıq Qarabağ münaqişəsinə və qonşu ölkənin fərsiz başçısına göndərdiyi sərt mesajlar təşkil etmişdir.
Prezidentimiz bu münaqişənin tarixinə qısa ekskurs etdikdən sonra Ermənistanın baş naziri Paşinyanın siması, Ermənistanın bugünkü rəhbərliyi ölkəni uçuruma aparmasını, məsuliyyətsizliyini konkret faktlarla ifşa etmiş , onun addımlarının nəyə gətirib çıxara biləcəyini düzgün təhlil edə bilməməsini söyləmişdir. Prezidentimiz xatırlatmışdır ki, iki il bundan əvvəl Ermənistanda dövlət çevrilişi baş verəndə Azərbaycan buna neytral qaldı, çünki Azərbaycan tərəfi Koçaryan-Sarkisyan xuntasının hakimiyyətdən getməsində maraqlı idi. Ermənistanın bundan əvvəlki hakimiyyəti erməni xalqında da ancaq nifrət hissləri doğururdu. Nikol Paşinyan hakimiyyəti isə hakimiyyətə gələr –gəlməz Azərbaycana qeyri-rəsmi kanallarla müsbət siqnallar göndərmiş, yalvarmış, vaxt istəmişdir.
Daha sonra Paşinyan Düşənbədə Azərbaycan Prezidentindən vaxt verilməsini birbaşa xahiş etmişdir.Paşinyan Ermənistanda daxili vəziyyətin ağır olmasını, keçmiş hakimiyyət nümayəndələrinin revanş almaq , danışıqlar prosesini pozmaq istəmələrini, özünün isə danışıqlara meyilli olmasını, məsələni həll etmək istəməsini demiş, atəşkəs rejiminin möhkəmlənməsini xahiş etmişdir.
Amma iyul, avqust, indi də sentyabr hadisələri göstərir ki, Ermənistan öz məğlubiyyətlərini qələbə kimi qələmə verməyə çalışır. Azərbaycan tərəfinin təqdim etdiyi görüntülər Ermənistanın heç bir qələbə qazanmadığını təsdiqləyir. Bu qələbədirsə, onda Ermənistan niyə Kollektiv Təhlükəsizlik Müqaviləsi Təşkilatına müraciət edir? İlham Əliyev çox erməni siyasətini çox sərrast şəkildə xatrakterizə edərək demişdir: “Ermənistan siyasətinin əsas qayəsi özlərini alçaltmaqdır, özlərindən məzlum, yazıq xalq imici düzəltməkdir, ağlaşmaqdır və ondan-bundan nə isə imtiyaz, ianə, qrant, kömək qoparmaqdır”.
Millət vəkili bildirmişdir ki, bu gün Ermənistanla faktiki olaraq danışıqlar getmir. Ermənistan rəhbəri danışıqlar prosesini pozub. Çünki onların cəfəng bəyanatları, təxribat xarakterli addımları danışıqları mənasız edir. Paşinyan həyasızcasına deyir ki, Azərbaycan Ermənistanla yox, Dağlıq Qarabağla danışıqlar aparmalıdır. Bu, formatı dəyişdirmək cəhdidir və buna Azərbaycan heç vaxt razı ola bilməz.
Azərbaycan danışıqlardan imtina etmir, ancaq Ermənistanın özünə görə bic siyasətinə qoşulmaq istəmir. Ölkəmiz imitasiya naminə danışıqlarda iştirak etmək niyyətində deyildir.
Prezident İlham Əliyev son günlər Ermənistanda cərəyan edən hadisələri çox gözəl xarakterizə etmişdir:”Ermənistan yeni böyük müharibəyə hazırlaşır. Onların təmas xəttinə yaxın qüvvələrinin cəmləşməsi baş verir. Kollektiv Təhlükəsizlik Müqaviləsi Təşkilatını, öz müttəfiqlərini bu işlərə cəlb etmək üçün zondaj aparılır…Ermənistan beynəlxalq hüququ yerə vurursa, Azərbaycan da beynəlxalq hüququ gözləməyəcək. Bizə qarşı ciddi təxribat törədilərsə, onda bizim üçün heç bir məhdudiyyət olmayacaq. Artıq Ermənistan ərazisinə keçmək üçün bizə heç bir hərbi maneə yoxdur”.
Millət vəkili bildirmişdir ki, Azərbaycan Prezidenti İLham Əliyevin müsahibəsinin son sözləri hər bir azərbaycanlının ürəyindən xəbər vermiş, onlarda böyük ruh yüsəkliyi yaratmış və vətənpərvərlik hisslərini daha da coşdurmuşdur: ”Dağıdılmış bütün tarixi abidələri, evləri bərpa edəcəyik. Küçələrə Azərbaycan adlarını verəcəyik, adları dəyişdirilmiş kəndlərə öz əsl adlarını qaytaracağıq. Qarabağ bizimdir, Qarabağ Azərbaycandır!”
aia.az
