Bakı. Trend:
Media şirkətləri süni intellekt xülasələri və çatbotların
istifadəsi ilə istehlakçıların internetdən istifadə vərdişlərinin
dəyişdiyini qeyd edir və növbəti üç il ərzində saytlarına onlayn
veb trafikin kəskin azalacağını gözləyirlər.
Trend xarici
KİV-ə istinadən xəbər verir ki, Reuters Jurnalistika Araşdırmaları
İnstitutunun 51 ölkədən 280 media lideri ilə apardığı yeni
hesabatda, qlobal media rəhbərlərinin axtarış sistemlərindən gələn
trafikdə üç il ərzində 43% azalma olacağından narahat olduqları
bildirilib. Hesabata görə, Google axtarışı artıq qlobal miqyasda
33% azalıb, ABŞ üçün isə bu rəqəm daha yüksəkdir.
Hesabatda həmçinin qeyd olunur ki, “Google”ın süni intellekt
icmalları artıq ABŞ-də axtarış nəticələrinin təxminən 10%-ni təşkil
edir və sürətlə digər ölkələrdə də yayılmaqdadır.
Qısa video və audio məzmunun populyarlığı artdıqca, media
şirkətləri jurnalistlərini YouTube və TikTok kimi platformalarda
kontent yaradıcısı kimi fəaliyyət göstərməyə təşviq etməyi
planlaşdırır. Sorğuda iştirak edən menecerlərin dörddə üçü 2026-cı
ildə işçilərinin yaradıcı fəaliyyətini artırmaq niyyətində
olduqlarını, yarısı isə yaradıcılarla əməkdaşlıq edərək
məzmunlarının yayılmasına dəstək verəcəklərini bildirib.
