Bakı. Trend:
Alimlər Keniyada qədim qayaüstü rəsmlərin müəlliflərini müəyyən
ediblər.
Trend xəbər verir
ki, bu barədə “Naked Science” nəşri yazır.
Keniyanın Kakapel sığınacağındakı qayaüstü incəsənət həmişə
bütöv mədəniyyətlərin dəyişməsinin bir növ salnaməsi olub: həndəsi
naxışlar, inək təsvirləri və mücərrəd işarələr burada bir-birinin
üzərinə dörd aydın qat şəklində düşür. Tədqiqatçılar bu qatları
yalnız ayırmaqla kifayətlənməyib, həm də müəyyən ediblər ki, ən
qədim rəsmlər piqmeyəbənzər ovçu-yığıcılar tərəfindən yaradılıb,
daha sonrakı inək və həndəsi təsvirlər isə nilotik dillərdə danışan
maldar tayfalara məxsusdur.
Kakapel sığınacağı Keniyanın qərbində, Elqon dağının ətəyindəki
təpələrdə yerləşir. Bu, uzunluğu 25 metr, dərinliyi təxminən beş
metr olan qranit qayaaltı sığınacaqdır. O, ilk dəfə 1976–1977-ci
illərdə tədqiqatçı Osaqa Odak tərəfindən təsvir edilib. O,
rəsmlərin təxmini eskizlərini hazırlamış, insanları, heyvanları və
həndəsi fiqurları ayırd etmişdi. Lakin nə o, nə də sonrakı
tədqiqatçılar təsvirlərin yaşını və müəlliflərini müəyyən edə
bilmişdilər.
2018–2020-ci illərdə sığınacaq ərazisində genişmiqyaslı
qazıntılar aparılıb, bu zaman sümüklər, keramika və insan qalıqları
aşkar edilib. Bu işlər zamanı alimlər bütün rəsmləri maksimum
dəqiqliklə sənədləşdiriblər. Bunun üçün onlar əl ilə konturlama
metodundan istifadə ediblər: təsvirlərin üzərinə nazik şəffaf
plyonka qoyulub və bütün detallar mexaniki qələmlərlə çəkilib.
Yerdən çatmaq mümkün olmayan hissələrə isə nərdivanlar və tikinti
qurğuları vasitəsilə çıxıblar.
