Bakı. Trend:
Afrikanın bir sıra media qurumlarını təmsil edən jurnalistlər
Ümumdünya Şəhər Forumunun 13-cü sessiyası (WUF13) ərəfəsində
Azərbaycanda təşkil olunan “Afrika Media Turu” çərçivəsində ölkənin
turizm potensialını, münaqişədən sonrakı bərpa işlərini və
şəhərsalma layihələrini araşdırıblar. Onlar Azərbaycanın
transformasiyası və qlobal tədbirə hazırlığı ilə bağlı müsbət
təəssüratlarını bölüşüblər.
Trend xəbər verir ki,
Azərbaycan rəsmiləri ilə görüşlər və Bakı, Qarabağ, eləcə də Şərqi
Zəngəzur bölgələrinə səfərlər zamanı Afrika media nümayəndə
heyətinin üzvləri ölkənin müasir infrastrukturu, multikultural
mühiti və iddialı planlaşdırma təşəbbüslərini əsas təəssüratlar
kimi qeyd ediblər.
“Bu elə bir ölkədir ki, bir neçə saat ərzində paytaxtdan xizək
kurortlarına və tarixi bölgələrə getmək mümkündür. Bu müxtəliflik
Azərbaycanın unikal üstünlüklərindən biridir”, – Azərbaycan Turizm
Bürosunun sədr müavini Teymur Süleymanzadə tur çərçivəsində Afrika
mediasına müsahibəsində bildirib.
Süleymanzadə Azərbaycanın geniş turizm potensialını –
dənizkənarı istirahətdən və qış turizmindən tutmuş mədəni irs
marşrutlarına qədər – vurğulayıb. O, həmçinin ölkənin
təhlükəsizliyi, tolerantlığı və Afrika bazarları ilə turizm
əməkdaşlığını genişləndirməyə artan marağı diqqətə çatdırıb.
Nümayəndə heyəti Şəhərsalma və Arxitektura üzrə Dövlət
Komitəsinin sədri, WUF13 üzrə milli koordinator Anar Quliyevlə də
görüşüb. O, Azərbaycanın əsasən dövlət dəstəyi ilə inkişaf edən,
eyni zamanda alternativ enerji və strateji sahələrdə özəl
investisiyalar üçün imkanları genişləndirən infrastruktur modelini
təqdim edib.
Səfər çərçivəsində afrikalı jurnalistlər Qarabağ və Şərqi
Zəngəzurda aparılan münaqişədən sonrakı bərpa işlərinə də xüsusi
diqqət yetiriblər.
“Burada diqqət çəkən əsas məqam məqsədyönlü inkişafdır –
minalardan təmizləmə, infrastrukturun bərpası və tamamilə yeni
yaşayış məntəqələrinin qurulması”, – azad edilmiş ərazilərə
səfərdən sonra nümayəndə heyətinin üzvləri bildiriblər.
Bakı Ağ Şəhər layihəsini ziyarət edən jurnalistlər keçmiş sənaye
zonası olan “Qara şəhər”in müasir şəhər məkanına çevrilməsini
uğurlu baş planlaşdırma nümunəsi kimi qiymətləndiriblər.
“Bu cür şəhər yenilənməsi inkişaf etməkdə olan ölkələr üçün
mühüm dərslər verir. Bu, uzunmüddətli planlaşdırmanın şəhərləri
necə dəyişə biləcəyini göstərir”, – Keniyanın TV47 telekanalının
jurnalisti Elizabet Mutuku bildirib və bunu Afrikadakı şəhərsalma
müzakirələri ilə müqayisə edib.
Nümayəndələr Zəngilan və Füzulidə müharibədən sonrakı bərpa
çərçivəsində yaşıl enerji və inteqrasiya olunmuş xidmətlər əsasında
yaradılmış “ağıllı kəndlər”lə də tanış olublar.
“Burada yaşayış, səhiyyə, ticarət və bərpa olunan enerji
həllərinin bir məkanda birləşdirildiyi icmalar qurulub. Bu,
araşdırılmağa dəyər modeldir”, – jurnalistlər qeyd ediblər.
Nümayəndə heyəti Zəngilanda dövlət dəstəyi ilə həyata keçirilən
ərikçilik də daxil olmaqla “ağıllı kənd təsərrüfatı” layihələrini
də yerində incələyib.
“2021-ci ildən əvvəl bu ərazilər əsasən boş idi, bu gün isə
məqsədyönlü investisiyalar sayəsində məhsuldar və yaşıldır. Bu,
kənd təsərrüfatının münaqişədən sonrakı bərpanın bir hissəsi ola
biləcəyini göstərir”, – afrikalı jurnalistlər bildiriblər.
İştirakçılar turun davamlı şəhərsalma, əlverişli mənzil
təminatı, yaşıl inkişaf və regional dirçəliş kimi istiqamətlər üzrə
faydalı nəticələr verdiyini vurğulayıblar. Qeyd olunub ki, bu
mövzular WUF13 çərçivəsində əsas müzakirə predmetlərindən
olacaq.
“Afrika Media Turu” 2026-cı ilin mayında BMT-nin UN-Habitat
proqramının himayəsi ilə Bakıda keçiriləcək Ümumdünya Şəhər
Forumunun 13-cü sessiyası ərəfəsində təşkil olunub. Davamlı
urbanizasiya üzrə aparıcı qlobal platformalardan biri olan forumun
dünya liderlərini, siyasətçiləri və ekspertləri bir araya
gətirəcəyi, şəhərlərin gələcəyinə dair müzakirələrin aparılacağı,
həmçinin Azərbaycanın şəhər transformasiyası və münaqişədən sonrakı
bərpa təcrübəsinin təqdim olunacağı gözlənilir.
