Bakı.Trend:
İpək Yolunun qədim şəhərləri Mərkəzi Asiya regionunda XXI əsrin
xidmət şəhərinin yaradılması üçün çoxsaylı ipucları verə bilər.
Trend xəbər verir
ki, bunu WUF13 çərçivəsində keçirilən “Mərkəzi Asiyanın yeni
paytaxtları və yeni şəhərləri. İqlim dayanıqlığının artırılması
məqsədilə su istehlakı nəzərə alınmaqla şəhərsalma və mənzil
tikintisi” mövzusunda sessiya zamanı britaniyalı memar, Harry Dobbs
Design Ltd şirkətinin təsisçisi və Alatau City İnkişaf Şurasının
üzvü Harri Dobbs deyib.
“Həm şəhər strukturu, həm də şəhər mədəniyyəti səviyyəsində –
qədim karvansara mədəniyyətindən müasir biznes rayonlarının
mədəniyyətinədək – bu təcrübələrdən yararlanmaq mümkündür. İnsan
dinamikası və münasibətlərinin bəzi aspektləri əslində o qədər də
dəyişməyib və bunlar bizə həm mədəni baxımdan bağlı, həm də müasir
bir model yaratmaq üçün ipucları verir”, – deyə o bildirib.
Dobbs qeyd edib ki, texnologiyalar bu dinamikanın bir hissəsinə
çevrilə bilər.
“Bu gün urbanizasiyanın miqyası və tempi tamamilə fərqlidir və
bu, ekoloji, sosial və texniki çağırışlar yaradır. Lakin eyni
zamanda, artıq bu problemləri tamamilə yeni üsullarla həll etməyə
imkan verən alətlərimiz də var. Burada “ağıllı” texnologiyalar
kömək edə bilər. Onlar şəhərlərin səmərəliliyini və təsirini
əvvəllər mümkün olmayan şəkildə anlamağa, izləməyə və idarə etməyə
imkan verir. Buna görə də, xidmət şəhərinin qədim logistikasını
“ağıllı” şəhər imkanları ilə birləşdirsək, sadəcə yuxarıdan aşağıya
qurulan tipik “smart city” rəqəmsal infrastrukturu deyil, açıq
məlumat ekosisteminə əsaslanan, sakinlərin xidmətlərin göstərilməsi
və şəhərin inkişafının mərkəzində dayandığı ağıllı xidmət şəhəri
əldə etmiş olarıq”, – deyə o əlavə edib.
