Bakı.Trend:
ABŞ Prezidenti Donald Tramp bəyan edib ki, İranla bağlana
biləcək hər hansı yeni saziş 2015-ci ildə 5+1 qrupu (ABŞ, Rusiya,
Çin, Britaniya, Fransa və Almaniya) ilə Tehran arasında imzalanmış
Birgə Hərtərəfli Fəaliyyət Planının (BHFP /JCPOA) tam əksi
olacaq.
Trend xəbər verir
ki, Tramp bu barədə “Truth Social”da paylaşım edib.
“İranla saziş ya möhtəşəm və əhəmiyyətli olacaq, ya da
ümumiyyətlə olmayacaq. Bu, Barack Obama administrasiyası tərəfindən
bağlanmış fəlakət dolu BHFP-nin tam əksi olacaq”,- deyə o
yazıb.
“(BHFP) İranın nüvə silahı əldə etməsi üçün birbaşa və açıq yol
idi. Xeyr, mən belə sazişlər bağlamıram!” – deyə ABŞ Prezidenti
bildirib.
Qeyd edək ki, fevralın 28-də ABŞ və İsrail İrana qarşı hərbi
əməliyyatlara başlayıb. Zərbələr ölkənin ən böyük şəhərlərinə, o
cümlədən Tehrana endirilib. Ağ Ev hücumu İslam Respublikasından
qaynaqlanan raket və nüvə təhdidləri ilə əsaslandırıb. İrana
endirilən zərbələr nəticəsində ölkənin ali rəhbəri ayətullah Əli
Xamenei və rəhbərliyin bəzi digər əsas fiqurları həlak olub. İranın
İnqilab Keşikçiləri Korpusu İsrailə qarşı genişmiqyaslı cavab
əməliyyatı həyata keçirdiyini bəyan edib. İran eyni zamanda
ballistik raketlər, qanadlı raketlər və pilotsuz uçuş aparatları
ilə ABŞ-nin Bəhreyn, İordaniya, İraq, Qətər, Küveyt, BƏƏ, Oman,
Səudiyyə Ərəbistanı və Suriyadakı obyektlərini hədəfə alır.
Münaqişə nəticəsində regionun enerji infrastrukturu və dəniz
nəqliyyatı da ciddi risk altına düşüb. Hörmüz boğazı ətrafında
təhlükəsizlik gərginliyi səbəbindən dünya bazarında neft qiymətləri
kəskin artıb.
Aprelin 7-də ABŞ və İran hərbi eskalasiyanın qarşısını almaq və
danışıqlar üçün imkan yaratmaq məqsədilə təxminən iki həftəlik,
müvəqqəti atəşkəs barədə razılığa gəliblər.
