Bakı. Trend:
ABŞ-nin vitse-prezidenti Ceyms Devid Vens bildirib ki, İsrail və
ABŞ-nin bir çox ortaq maraqları var, amma yolların ayrıldığı
vaxtlar olur.
Trend bu barədə
xarici mediaya istinadən xəbər verir.
“Düşünürəm ki, prezident çox aydın şəkildə bildirib ki, İsrailin
açıq-aydın öz məqsədləri olsa da, ABŞ-nin İrana münasibətdə əsas
məqsədi Tehranın heç vaxt nüvə silahı əldə etməməsini təmin
etməkdir”, – deyə o əlavə edib.
Vensin açıqlamaları ABŞ kəşfiyyatının son hesabatları
Vaşinqtonda dərin narahatlıq doğurduqdan sonra verilib. Bu
məlumatlara görə, İsrail kəşfiyyat orqanları ABŞ və İran arasında
sülh danışıqlarında iştirak edən amerikalı diplomatları
izləyiblər.
Daha əvvəl Donald Tramp Livandakı İsrail Müdafiə Qüvvələrinin
zərbələri ilə bağlı qızğın telefon danışığı zamanı Netanyahunu “dəli” adlandırdığını təsdiqləmişdi. Bu hadisə iki lider arasında
fikir ayrılığını üzə çıxardı. İsrail və Amerika rəsmiləri arasında
İranla danışıqlar formatı ilə bağlı gərginliyin artması fonunda
Pentaqon İsraili ABŞ-yə qarşı əsas əks-kəşfiyyat təhdidləri
siyahısına əlavə edib.
Vitse-prezident etiraf edib ki, İsrailin təhlükəsizliklə bağlı
narahatlıqları hələ də əhəmiyyətli bir amil olaraq qalsa da,
ABŞ-nin İrana qarşı siyasəti həmişə yalnız Amerikanın milli
maraqları ilə idarə olunacaq.
Vens qeyd edib: “Son bir il yarım ərzində biz lazımi diplomatik
məkan yaratmışıq. Prezident inanır ki, məncə, o, tamamilə haqlıdır
– İranın nüvə məsələsinin davamlı həllinə nail ola bilərik. İsrail
bunu bəyənə də bilər, bəyənməyə də bilər. Amma nəticə etibarilə biz
inanırıq ki, bu, Amerika Birləşmiş Ştatlarının maraqlarına
uyğundur”.
