Bakı. Trend:
Fransa hökuməti 2026-cı il üzrə iqtisadi artım proqnozunu
əvvəlki 0,9 faizdən 0,7 faizə endirib. Qərar ilin ilk rübündə
iqtisadi göstəricilərin gözləniləndən zəif olması və Yaxın Şərqdəki
münaqişənin iqtisadi fəaliyyətə təsirləri ilə əsaslandırılıb.
“Le Monde” nəşrinin məlumatına görə, iqtisadiyyat naziri bu
açıqlamanı dövlət maliyyəsi üzrə xəbərdarlıq komitəsinin iclası
zamanı verib. Yeni proqnoz Fransa Mərkəzi Bankının iyun ayında
açıqladığı 0,5 faizlik artım gözləntisindən yüksək olsa da, Milli
Statistika və İqtisadi Araşdırmalar İnstitutunun (INSEE),
Beynəlxalq Valyuta Fondunun (BVF) və İqtisadi Əməkdaşlıq və İnkişaf
Təşkilatının (OECD) 0,7 faizlik proqnozları ilə üst-üstə düşür.
İqtisadiyyat Nazirliyi bildirib ki, birinci rübdə ÜDM-in zəif
nəticələri və ikinci rübdə Yaxın Şərqdəki müharibənin iqtisadiyyata
təsiri artım tempini aşağı salır. Nazirlik ilin qalan hissəsi ilə
bağlı ehtiyatlı mövqe sərgiləyəcəyini qeyd edib.
Rəsmilər hesab edirlər ki, iyun ayında inflyasiya səviyyəsinin
azalması və istehlakın bərpası müsbət amillər olsa da, bunlar ilin
yekununda 0,9 faizlik artıma nail olmaq üçün kifayət etməyəcək.
Hökumət ilin əvvəlində ÜDM-in 1 faiz artacağını
proqnozlaşdırmışdı. Lakin Yaxın Şərqdə münaqişənin başlanmasından
sonra bu göstərici əvvəlcə 0,9 faizə, indi isə 0,7 faizə
endirilib.
Fransa Hesablama Palatası da iqtisadi artımın zəifləməsi və faiz
dərəcələrinin yüksəlməsi səbəbindən 2026-cı ildə büdcə kəsirinin
azaldılması hədəfinin risk altında olduğunu bildirib. Baş nazir
vəziyyəti müzakirə etmək üçün dövlət maliyyəsi üzrə xəbərdarlıq
komitəsini toplayıb. Hökumətin yaxın günlərdə əlavə qənaət
tədbirləri elan edə biləcəyi və büdcə kəsirini 2026-cı ildə ÜDM-in
5 faizi səviyyəsində saxlamağı hədəflədiyi qeyd olunur.
