Bakı. Trend:
İtaliyanın Auqusta limanında “Azeri Light” markalı Azərbaycan
neftinin CIF bazasında qiyməti əvvəlki göstərici ilə müqayisədə
3,29 ABŞ dolları və ya 3,34 faiz artaraq bir barel üçün 101,87 ABŞ
dolları təşkil edib.
Bu barədə Trend-ə neft bazarındakı mənbə məlumat verib.
Bildirilib ki, Türkiyənin Ceyhan limanında “Azeri Light” markalı
neftin FOB bazasında bir barelinin qiyməti 3,39 dollar və ya 3,57
faiz bahalaşaraq 98,25 dollar olub.
“URALS” markalı xam neftin qiyməti əvvəlki göstərici ilə
müqayisədə 2,92 dollar və ya 4,71 faiz artaraq bir barel üçün 64,91
dollara çatıb.
Şimal dənizində hasil edilən “Dated Brent” markalı neftin
qiyməti isə əvvəlki göstərici ilə müqayisədə 4,41 dollar və ya 4,78
faiz artaraq bir barel üçün 96,57 dollara çatıb.
Azərbaycanın 2026-ci il dövlət büdcəsində bir barel neftin orta
qiyməti 65 ABŞ dolları səviyyəsində hesablanıb.
“Trading Economics”in məlumatına əsasən, xam neftin qiyməti cümə
günü təxminən 1 faiz artaraq bir barel üçün 85 ABŞ dollarına
yaxınlaşıb. Bildirilib ki, bununla da iyul ayı üzrə ümumi artım 20
faizi ötüb və bu, mart ayından bəri qeydə alınan ən güclü aylıq
yüksəliş olub. Bahalaşmaya əsas səbəb geosiyasi gərginliyin
dərinləşməsi və qlobal neft təchizatı ilə bağlı narahatlıqların
artmasıdır.
“İran ABŞ hərbi qüvvələrinin müşayiəti ilə Hörmüz boğazından
keçən iki neft tankerinə hücum etdiyini iddia etsə də, Qərbin dəniz
təhlükəsizliyi qurumları bu məlumatı hələlik təsdiqləməyib.
ABŞ və İran arasında yenidən alovlanan qarşıdurma, husilərin
Qırmızı dənizdə həyata keçirdiyi hücumlar və Səudiyyə Ərəbistanının
İranın dəstəklədiyi qruplaşmalara qarşı zərbələri əsas dəniz
nəqliyyatı marşrutlarının təhlükəsizliyi ilə bağlı riskləri
artırıb.
ABŞ-də xam neft ehtiyatlarının azalması da qiymətlərə əlavə
dəstək verib.
Eyni zamanda, Rusiyanın Qara dənizdə yerləşən neft ixracı
infrastrukturuna, o cümlədən Xəzər Boru Kəməri Konsorsiumunun (CPC)
terminalı yaxınlığında baş verən hücumlar Qazaxıstan neftinin
ixracında mümkün fasilələrlə bağlı narahatlıqları artırıb.
Qazaxıstan nefti Avropa emal müəssisələri üçün mühüm xammal
mənbələrindən biridir.
CPC fəaliyyətini davam etdirmək qərarı versə də, təchizatın
təhlükəsizliyi ilə bağlı qeyri-müəyyənlik neft qiymətlərinin yüksək
səviyyədə qalmasına dəstək verməkdə davam edir”, – məlumatda qeyd
edilib.
