Bakı. Trend:
Rusiya neft emalı zavodlarına (NEZ) zərbələrin dayandırılması
ilə bağlı çağırışlara məhəl qoymayan Volodimir Zelenskinin
özündənrazılığı ABŞ Prezidenti Donald Trampı özündən çıxarır. Bu
barədə bazar ertəsi günü The Atlantic jurnalı Ağ Evin
nümayəndəsinə istinadən məlumat yayıb.
“Zelenski özündənrazı davranır və prezidenti özündən çıxarır”, –
jurnal ABŞ administrasiyasının adının açıqlanmasını istəməyən
nümayəndəsinin sözlərini sitat gətirir. “Prezident ondan yalnız bir
şey xahiş edir: neft emalı zavodlarına zərbələri dayandırmaq. Bunu
ona ver”, – deyə The Atlantic nəşrinin həmsöhbəti əlavə
edib.
Jurnal vurğulayır ki, Zelenski 2025-ci ilin fevralında Ağ Evdə
Trampla yaşadığı mübahisədən sonra bir ildən çox müddət ərzində ABŞ
lideri ilə münasibətləri bərpa etməyə çalışıb. Bu müddətdə Ukrayna
rəsmiləri “onun (Trampın – TASS-ın qeydi) Ukraynanın maraqlarına
zərər vuracaq addımlar atmayacağına ümid edirdilər”. “Görünür, bu
ümid getdikcə azalır”, – deyə The Atlantic qeyd edir və
diqqəti Trampın “Zelenskini sülhə gedən yolda əsas maneə hesab
etməkdə davam etdiyinə” yönəldir.
Oktyabrın 11-də Axios portalı Trampın Zelenskiyə qəzəbləndiyini
və Ukraynanın Rusiya neft emalı zavodlarına zərbələri
dayandırmasını gözlədiyini bildirib. ABŞ Prezidenti oktyabrın 10-da
bəyan edib ki, ölkəsi Zelenskidən Rusiya neft emalı zavodlarına
zərbələr endirməməyi dəfələrlə tələb edib, lakin o, bu çağırışlara
məhəl qoymayıb.
Oktyabrın 9-da Rusiya Prezidenti Vladimir Putinlə Tramp arasında
telefon danışığı olub. Tərəflər söhbət zamanı, o cümlədən neft
məhsullarının tədarükünü müzakirə ediblər. Rusiya liderinin
sözlərinə görə, Moskva ABŞ və dünya bazarlarına neft və neft
məhsulları tədarük etməyə hazır olduğunu bir daha təsdiqləyib.
Rusiyanın Baş nazirinin müavini Aleksandr Novakın sözlərinə
görə, Rusiya dizel yanacağının ixracına qoyulan qadağanı əvvəlcədən
nəzərdə tutulan müddətdən daha tez yumşaltmağa başlayır. Rusiya
oktyabrda 300 min ton, noyabrda 500 min ton, dekabrda isə 1 milyon
ton dizel yanacağı tədarük etməyə hazırdır. Gələcəkdə bu həcmin
ayda 3 milyon tona çatdırılması nəzərdə tutulur.
Vaşinqton administrasiyası 2027-ci il aprelin 7-dək Rusiya dizel
yanacağının dünya bazarlarına tədarükünü ABŞ-ın sanksiyalarından
azad edir.
