Bakı. Trend:
İran regionda gərginliyin azaldılması üçün diplomatiyaya
məsuliyyətlə yanaşır.
İran Xarici İşlər Nazirliyinin məlumatına görə, bunu İranın
xarici işlər naziri Seyid Abbas Əraqçi oktyabrın 17-də İraqın
paytaxtı Bağdadda İslam Əməkdaşlıq Təşkilatının Xarici İşlər
Nazirləri Şurasının 52-ci iclası çərçivəsində Misirin xarici işlər
naziri Bədr Əbdülati ilə görüşündə deyib.
“Lakin ABŞ tərəfi diplomatiya ilə bağlı öhdəliklərini yerinə
yetirməyib və sonuncu dəfə müharibənin başa çatması ilə bağlı
İslamabad Anlaşma Memorandumunun icrasını imzalanmasından iki həftə
sonra dayandırıb”, – deyə o bildirib.
Əraqçi qeyd edib ki, Hörmüz boğazında mövcud vəziyyət ABŞ və
İsrailin İrana hava zərbələri endirməsinin nəticəsidir.
Görüş zamanı iranlı nazir vasitəçilər vasitəsilə aparılan
diplomatik məsləhətləşmələrin son vəziyyəti barədə məlumat
verib.
Görüşdə Ərəbistan yarımadasında baş verən hadisələrlə əlaqədar
fikir mübadiləsi aparılıb. İranın Səudiyyə Ərəbistanı ilə Yəmən
arasında qarşıdurmaların dayandırılması istiqamətində istənilən
köməyi göstərməyə hazır olduğunu bildirən iranlı nazir qeyd edib
ki, 12 illik gərginlik təcrübəsi Yəmən məsələsi üçün heç bir həll
yolunun olmadığını göstərir.
Xatırladaq ki, ABŞ-İran münasibətlərində növbəti gərginlik
iyulun 8-də başlayıb. Həmin gün ABŞ Silahlı Qüvvələri Vaşinqton və
Tehran arasında imzalanmış memorandumdan sonra ilk dəfə olaraq,
Hörmüz boğazında ticarət gəmisinə hücuma cavab olduğu iddiası ilə
İran ərazisinə bir neçə silsilə zərbə endirib. Elə həmin gün ABŞ
Prezidenti Donald Tramp İranla atəşkəs rejiminin dayandırıldığını
bəyan edib. Buna cavab olaraq Tehran Bəhreyn, İordaniya, Qətər,
Küveyt, BƏƏ və Oman ərazisində yerləşən ABŞ obyektlərinə zərbələr
endirməyə başlayıb. Konflikt nəticəsində Hörmüz boğazında dəniz
ticarəti iflic vəziyyətə düşüb.
