Bakı.Trend:
Amerika-Azərbaycan Ticarət Palatası (USACC) və Amerika Mülki
Tədqiqatlar və İnkişaf Fondu ABŞ Dövlət Departamentinin Təhdidlərin
Qarşısının Alınması üzrə Əməkdaşlıq Ofisi və PwC şirkətinin
ekspertləri ilə birgə Azərbaycanda sanksiya rejimlərinə əməl
olunması və maliyyə risklərinin idarə edilməsi məsələlərinə həsr
olunmuş birgünlük konfrans təşkil edəcək.
Bu barədə Trend
USACC-a istinadən xəbər verir.
Tədbir mayın 14-də keçiriləcək və Azərbaycanın maliyyə
institutları ilə tənzimləyici qurumlarının nümayəndələri üçün
nəzərdə tutulub. Tədbirin məqsədi sanksiyaya məruz qalan
subyektlərlə əməliyyatlar zamanı yaranan maliyyə, reputasiya və
yurisdiksiya riskləri barədə anlayışı dərinləşdirmək, həmçinin
beynəlxalq sanksiya rejimləri və qanunsuz ticarət, eləcə də
silahların yayılmasının maliyyələşdirilməsi ilə bağlı müasir
təhdidlər barədə bilikləri gücləndirməkdir.
Proqram çərçivəsində sanksiyalardan yayınma halları, ikili
təyinatlı malların tədarükünün şaxələndirilməsi metodları, eləcə də
beynəlxalq logistika və maliyyə zəncirlərindən qanunsuz məqsədlərlə
istifadə məsələlərinə xüsusi diqqət yetiriləcək.
Bundan əlavə, Beynəlxalq Sülh və Rifah Naminə Tramp Marşrutu
(Trump Route for International Peace and Prosperity – TRIPP) kimi
təşəbbüslər də daxil olmaqla, şəffaf və tələblərə uyğun ticarət
marşrutlarının inkişaf etdirilməsinin vacibliyi xüsusi
vurğulanacaq. Bu təşəbbüs qlobal ticarət sisteminin dayanıqlığının
gücləndirilməsi kontekstində nəzərdən keçirilir.
Konfrans iştirakçıları ekspert sessiyalarında, praktiki
keyslərin təhlilində və qurumlararası koordinasiyanın
yaxşılaşdırılması, həmçinin komplayens standartlarının
yüksəldilməsinə yönəlmiş təlimlərdə iştirak edəcəklər.
Proqram çərçivəsində həmçinin genişləndirilmiş “due diligence”
prosedurları, KYC və KYCC mexanizmləri, eləcə də sanksiyalardan
yayınma risklərinin aşkarlanması üçün açıq mənbə alətlərindən
(OSINT) istifadə məsələləri əhatə olunacaq.
Təşkilatçılar bildirirlər ki, siyasi müzakirələrlə praktiki
təlimlərin vəhdəti institusional potensialın gücləndirilməsinə,
regional dayanıqlılığın artırılmasına və Azərbaycanla ABŞ arasında
genişlənən əməkdaşlıq çərçivəsində təhlükəsiz və şəffaf beynəlxalq
ticarətin inkişafına töhfə verəcək.
