Bakı.Trend:
Kişinyovun Baş planı 2007-ci ildə, torpaq istifadəsi qaydaları
isə 2008-ci ildə işlənib hazırlanıb.
Trend xəbər
verir ki, bu barədə Kişinyov bələdiyyəsinin nümayəndəsi Svetlana
Dünya Şəhər Forumunun 13-cü sessiyası (World Urban Forum 13)
çərçivəsində keçirilən “İki region, bir gündəm: inklüziv şəhər
yenilənməsi üzrə dərslər” adlı panel müzakirəsində bildirib.
O bildirib ki, lakin bu planların həmin ərazidə istifadəsi və
tətbiqi üçün nəqliyyat sxeminin həlli ilə birlikdə xüsusi
zonalaşdırma planı hazırlanmalı idi: “Təəssüf ki, uzun müddət bunu
həyata keçirmək mümkün olmayıb. Amma iki il əvvəl bu ərazi üçün
zonalaşdırma planının hazırlanmasına başlanılıb və eyni zamanda
qanunvericiliyə uyğun olaraq çox detallı tarixi istinad planı
hazırlanmalı olub”.
O vurğulayıb ki, şəhər mərkəzində nələrin qorunmalı olduğu və
hansı müdaxilələrin edilə biləcəyi ilə bağlı ciddi müzakirələr
gedir: “Bu işlə paralel olaraq ötən ildən etibarən şəhərin yeni baş
planının hazırlanmasına da başlanılıb. Məqsəd bu iki sənədi bir
biri ilə uyğunlaşdırmaq, onların ziddiyyət təşkil etməməsini təmin
etmək və eyni zamanda nəqliyyat məsələlərini həll etməkdir”.
Qeyd edək ki, bu gün Bakıda WUF13-ün dördüncü günü
keçirilir.
Forumun ilk günündə Yeni Şəhər Gündəliyinə həsr olunmuş nazirlər
görüşü, nazirlərin dəyirmi masası, qadın və vətəndaş cəmiyyəti
assambleyaları, biznes sessiyaları və şəhərlərin rifahı ilə bağlı
müzakirələr baş tutub. Forum çərçivəsində həmçinin BMT və
Azərbaycan bayraqlarının qaldırılması mərasimi keçirilib.
Forumun ikinci günü ilk dəfə təşkil olunan Liderlər Sammiti ilə
diqqət çəkib. Həmin gün qlobal mənzil böhranı, urbanizasiya
siyasəti və şəhərlərin dayanıqlılığına həsr olunmuş yüksək
səviyyəli müzakirələr keçirilib. Eyni zamanda, WUF13 çərçivəsində
Mexiko şəhərinin pavilyonunun açılışı olub. Pavilyon Latın
Amerikası regionu ilə əməkdaşlığın genişləndirilməsi və WUF14-ə
hazırlıq üçün mühüm platforma kimi təqdim edilib.
WUF13-ün üçüncü günü də geniş tədbirlər proqramı ilə yadda
qalıb. Həmin gün qlobal mənzil böhranı, təhlükəsiz və inklüziv
şəhərlərin formalaşdırılması, iqlim dayanıqlılığı, süni intellekt
və şəhər idarəçiliyi, “yaşıl” urbanizasiya, sosial bərabərlik və
dayanıqlı nəqliyyat kimi mövzular ətrafında müzakirələr
aparılıb.
Üçüncü gün çərçivəsində xüsusi diqqət çəkən hadisələrdən biri
Azərbaycanın Şuşa şəhəri ilə Türkiyənin Trabzon şəhəri arasında
qardaşlaşma haqqında memorandumun imzalanması olub.
Həmçinin, WUF tarixində ilk dəfə Azərbaycanın təşəbbüsü ilə “WUF13 QHT Forumu: Qlobal Tərəfdaşlıqlar və Qərarvermə” (“WUF13 NGO
Forum”) keçirilib.
182 ölkədən 40 mindən artıq iştirakçının qeydiyyatdan keçdiyi
WUF13 mayın 22-dək davam edəcək. “Hamı üçün mənzil: təhlükəsiz və
dayanıqlı şəhərlər və yaşayış məntəqələri” mövzusuna həsr olunmuş
forum hökumətləri, beynəlxalq təşkilatları, ekspertləri və vətəndaş
cəmiyyəti nümayəndələrini bir araya gətirərək dayanıqlı şəhər
inkişafı sahəsində qlobal əməkdaşlığın gücləndirilməsinə xidmət
edir.
