Bakı. Trend:
Ümumdünya Səhiyyə Təşkilatı Afrikada ebola virusu yayıldığını
təsdiqləyib.
Trend bu
barədə xarici mediaya istinadən xəbər verir.
Məlumata görə, ÜST Konqovə Uqandada Ebola epidemiyasının
yayıldığını artıq təsdiqləyib. Epidemiyaya səbəb virusun “Bundibugyo” növüdür və hazırda bu ştama qarşı lisenziyalı peyvənd
və ya spesifik müalicə mövcud deyil.
Səhiyyə qurumlarının bildirdiyinə görə, vəziyyət xüsusilə
humanitar böhran, ucqar və sıx məskunlaşmış bölgələr, təhlükəsizlik
problemləri və yüksək əhali hərəkətliliyi səbəbindən mürəkkəb
olaraq qiymətləndirilir. Bu faktorlar virusun yayılma riskini
artırır.
ÜST hər iki ölkənin hökumətlərinə dəstəyi gücləndirib. Nəzarət
tədbirləri, təmasların izlənməsi, klinik hazırlıq, tibbi təchizatın
çatdırılması, sərhədyanı koordinasiya və icmaların prosesə cəlb
olunması istiqamətində işlər genişləndirilir.
ÜST ekspert qrupları potensial peyvənd və müalicə vasitələrini
qiymətləndirmək üçün ayrıca məsləhət platformaları yaradıb. Qurumun
məlumatına görə, bütün müalicə vasitələri yalnız ciddi klinik
sınaqlar çərçivəsində, təhlükəsiz və etik qaydalara uyğun şəkildə
istifadə oluna bilər.
Hazırda “Bundibugyo Ebola” virus xəstəliyinə qarşı təsdiqlənmiş
peyvənd və ya xüsusi terapevtik müalicə yoxdur. Səhiyyə rəsmiləri
bildirirlər ki, epidemiyanın nəzarət altına alınmasında əsas rol
icmaların aktiv iştirakı və profilaktik qaydalara əməl
edilməsidir.
